Pagtaraid na mga Isla, Hong Kong

An Pagtaraid na mga Isla o Outlying Islands minatumoy sa gabos na mga isla na minabilog kan teritoryo kan Hong Kong, maliban sa mismong Isla nin Hong Kong. Igwa nin 263ng isla sa Hong Kong, an kadaklan kaini namumugtak sa laog kan Bagong mga Teritoryo asin dakol kaini an namumugtak man sa Distrito nin mga Isla sa sur asin sa sur-sulnopan, Distrito nin Sai Kung sa sur-subangan, asin sa Distrito nin Tai Po asin Norteng Distrito sa norteng subangan. An terminong outlying daing gayong eksakto an pakahulogan asin sa nagkapirang kaso an mga isla na haranihon sa Isla nin Hong Kong asin kadagaan nin Tsina dai digdi kabali.

An masakit na transportasyon digdi nangangahulogan nin huring pag-abot nin pagbabago digdi kompara sa ibang parte kan Hong Kong, asin dakol na mga isla an dai pa napapauswag. Dakol sa pagtaraid na mga isla an daing gayo nin populasyon asin haros yaon sa rural na kamugtakan, alagad igwa nin mahahalagang komunidad asin banwaan na eksistido sa mga isla kan Lantau, Peng Chau, Lamma, asin Cheung Chau.

Alagad, igwa nang pagbabago pasiring sa pagigin urban kan mga isla. Siring kaini an isla kan Tsing Yi na naging parte kan Bagong Banwaan nin Tsuen Wan mga huring dekada 1970, asin ngunyan nakakatakod na sa interong Hong Kong huli kan manlainlain na tinampo asin tuloy na riles. Kan dekada 1980, an Discovery Bay pribadong pinauswag bilang sarong lugar nin residensya sa Lantau, na siniserbisyohan nin sarong marikas na lantsa pasiring sa sentro distrito nin merkado. Kan dekada 1990, an pagtugdok kan bagong Hong Kong Airport, sa norteng baybayon kan Lantau, nagbunga nin paggibo nin sarong takod nin tinampo asin riles sa isla asin pagbabago kan Tung Chung na dating sadit na komunidad pasiring sa sarong bagong banwaan harani sa eropuerto. Bilang resulta kan madaling transportasyon, nagpadagos an kauswagan sa Lantau, kabali digdi an sarong tinampo pasiring sa Discovery Bay, asin an pagkakagibo kan Hong Kong Disneyland Resort.

Kadaklan sa mga rural na isla asin kan mga rural na parte kan Lantau bantog bilang mga pasyaran asin destinasyon kun weekend duman sa mga nakaistar sa teritoryo na igwang gubgob na populasyon.